Ang mga Hagdan-Hagdang Palayan

Sa mga bundok ng Ifugao, matatagpuan ang mga hagdan-hagdang palayan na inukit ng mga ninuno ng mga Ifugao mahigit dalawang libong taon na ang nakararaan, ayon sa ilang tantiya. Ginawa nila ito gamit lamang ang kanilang mga kamay at payak na kasangkapan. Ang tubig mula sa kagubatan sa tuktok ng bundok ay dinadaloy pababa sa bawat baitang sa pamamagitan ng isang mahusay na sistema ng patubig. Noong 1995, isinama ng UNESCO ang Rice Terraces of the Philippine Cordilleras sa listahan ng mga World Heritage Site. Gayunman, makalipas ang ilang taon, napabilang ito sa listahan ng mga pamanang nanganganib. Maraming kabataang Ifugao ang lumilipat sa lungsod upang maghanap ng ibang trabaho, kaya nawawalan ng mag-aalaga sa mga palayan. Bukod dito, nasisira rin ang ilang pader dahil sa mga bulate at sa pagbabago ng klima. Sa tulong ng pamahalaan at ng mga lokal na samahan, isinagawa ang mga programa upang ayusin ang mga palayan at hikayatin ang kabataan na ipagpatuloy ang tradisyon. Dahil dito, naalis ito sa listahan ng nanganganib na pamana. Gayunman, nananatili ang hamon na mapanatili ito para sa susunod na henerasyon.