Ang Karapatan ng Mamimili

Ang bawat mamimili ay may mga karapatang pinoprotektahan ng Consumer Act of the Philippines. Kabilang dito ang karapatan sa kaligtasan, ang karapatan sa tamang impormasyon, ang karapatang pumili, at ang karapatang marinig ang reklamo. Ayon sa batas, kailangang malinaw ang presyo ng bawat produkto at hindi ito dapat itaas nang labis lalo na sa panahon ng kalamidad. Dapat ding nakasulat sa etiketa ang mahahalagang impormasyon gaya ng sangkap, petsa ng pagkapaso at pangalan ng gumawa. Kapag may depekto ang biniling produkto, may karapatan ang mamimili na ipaayos, palitan o ipabalik ang bayad nito. Sa katunayan, ang karatulang "No return, no exchange" ay labag sa batas kung ang produkto ay may sira. Gayunman, may tungkulin din ang mamimili. Dapat niyang basahin ang etiketa, itago ang resibo, at gamitin nang tama ang produkto. Kung may reklamo, maaari siyang lumapit sa Department of Trade and Industry (DTI). Ang mapanuring mamimili ang pinakamabisang proteksiyon laban sa mapagsamantalang negosyante.